ಮಾವು ಹಣ್ಣಾಗಿತ್ತು. ಹಕ್ಕಿಗೆ ಹಸಿವಾಗಿತ್ತು. ಕಾಲವೇ ಕೂಡಿಸಿದಂತೆ ಹಾರಿಬಂದು ಹಣ್ಣು ಕಂಡು ಖುಷಿಯಿಂದ ಹಾರಾಡಿತು. ಮೆಲ್ಲನೆ ಕುಕ್ಕಿ, ಕುಕ್ಕಿ ಸವಿಯಿತು. ಮಧ್ಯಾಹ್ನವಾಯಿತು. ದಾರಿಹೋಕ ಬಿಸಿಲ ಬೇಗೆಗೆ ಧಣಿವಾಗಿ ಮರದ ಬಳಿ ಬಂದನು. ಕುಳಿತು ಕತ್ತೆತ್ತಿ ನೋಡಿದರೆ ಹಣ್ಣಾಗಿ ಹಕ್ಕಿಮುಕ್ಕಿದ ಹಣ್ಣು ಕಂಡು ಖುಷಿಯಾದ. ಅರೆತಿಂದ ಹಣ್ಣು ಬಲುಸವಿಯೆಂದು ಕಿತ್ತು ತಿಂದನು. ಮಾವಿನಗಿಡ ಇಬ್ಬರಿಗೆ ತೃಪ್ತಿ ನೀಡಿ ಖುಷಿಯಾಯಿತು.
ಹಣಕ್ಕಾಗಿ ಆತುರ ಪಟ್ಟು ಕಾಯಿಗಳ ಕಿತ್ತು, ಔಷಧಿಯಲ್ಲಿ ಹಣ್ಣುಮಾಡಿ ಲೋಕ ರಂಜಿಸುವ ಕಾಲದಲ್ಲಿ ಮೇಲಿನ ಕಥೆಯೊಂದು ಚಿತ್ರವಾಗಿ ನಗರದಲ್ಲಿ ನೇತಾಡುತ್ತಿತ್ತು.
- ಅಂಕುರ
